O sector mineiro en Galicia
Actualmente, o cobre é o terceiro metal máis utilizado no mundo. A produción mundial de cobre de mina foi de máis de 20 millóns de toneladas en 2017 e destinouse fundamentalmente a tecnoloxía, industria e construción. Ademais, é fundamental nas tecnoloxías verdes: xeradores eólicos, plantas solares, coches eléctricos, e en xeral todos os desenvolvementos que teñen que ver coa enerxía renovable son moi intensivos no uso do cobre.
Galicia é moi rica en recursos mineiros, como o cobre, e así o resalta o Catedrático de Economía Aplicada da Universidade de Santiago de Compostela, Aureliano García. “Galicia é a cuarta comunidade de España en importancia mineira con 270 empresas e aproximadamente 7.000 traballadores. Os principais recursos que podemos atopar son as rocas ornamentais (granito e lousa), as canteiras e os mananciais de augas”, explica.
En Galicia, existen bos exemplos de proxectos mineiros nos que se empregaron as mellores técnicas operativas e de maneira responsable logrouse reintegrar na paisaxe as áreas afectadas polas operacións, por exemplo as grandes minas ao descuberto de carbón de Meirama e As Pontes..